Yad Vashem – “Ek sal aan hulle ‘n naam gee” (1)

Die besoek aan Yad Vashem is baie emosioneel en ontstellend en eintlik moet mens meer tyd hê en alleen wees as jy kyk en luister.  Dis ‘n gedenkmuseum vir die 6 miljoen Jode wat deur Hitler doodgemaak is vanaf 1933 en vier en ‘n half jaar geduur het; en hulle enigste misdaad was dat hulle Jode is.

Die naam Yad Vashem is geneem uit Jes. 56:5 “Ek sal aan hulle in my huis en binnekant my mure ’n gedenkteken en ‘n naam (Yad Vashem in Hebreeus) gee wat beter is as seuns en dogters; ‘n ewige naam gee Ek aan hulle wat nie uitgeroei sal word nie”.  Die museum dra hulle wat nie nageslag het nie se naam voort.

Die museum bestaan uit 9 galerye en is gebou in 1953. Die uitstallings sluit in fotos, films, dokumente, briewe, kunswerke, en persoonlike items wat in die ghettos en strafkampe gekry is soos skoene, klere, dagboeke en speelgoed.  Dit is die grootste versameling in die wêreld en bestaan uit 55 miljoen dokumente, 100 000 fotos.

Dis onbeskryflik hartseer om te dink hele gesinne is uit hulle huise gegryp en na gaskamers gestuur. Die films van die oorlewendes vertel van ouers wie se kinders van hulle af weggeskeur is en as hulle gevra om dit nie te doen nie slaan hulle die kind voor jou dood.

Die eerste saal is die Hall of Remembrance (Ohel Yizkor) met ‘n “memorial flame” met ‘n houer voor die vlam wat van die as van die slagoffers in het.  Al wat verder in hierdie strak vertrek is, is die name van die 21 Nazi moord kampe in sentraal en Oos-Europa.

Die indrukwekkende kinderafdeling het miljoene liggies wat dag en nag flikker in ‘n donder galery ter nagedagtenis van die 1½ miljoen kinders wat vermoor is.  Op die agtergrond is ‘n stem wat die name, ouderdom en plek sê van die kinders wat vermoor is.

(Foto geleen by   http://yad-vashem.blogspot.co.za/2014_06_01_archive.html)

Die Hall of Names is ‘n gedenksaal vir die 6 miljoen Jode en bestaan uit twee kegels, 10m hoog en water onder in.  Die fotos aan die bokant reflekteer in die water en herdenk die wie se name onbekend bly. Rondom is die miljoene dokumente wat al bymekaar gemaak is met oop spasies vir die inligting wat nog ontvang sal word.

Een van die hoofdoele van die museum is om die Nie-Jode te herdenk wat hulle lewens gewaag het om die Jode te red.  Daar was vir hulle geen voordeel daarin nie, nie finansieël of Evangelies nie maar hulle het dit nogtans gedoen.  Na baie deeglike studie is daar medaljes aan hulle uitgereik en is hulle name in die Garden of the Righteous Among the Nations geplaas.  Sover is daar 24 300, waaronder Franciscus van Assisi, maar kan nog meer word soos inligting verkry word.

Die pilare is net half soos wat die kinders se lewens kortgeknip is.

 

Die Tuin en die Goue Poort

Ons kon nie genoeg van die uitsig vanaf die Olyfberg kry nie.  Die goue koepel van die Moslem kerk is ‘n bekende baken in Israel.

Die Goue Poort waardeur die Jode glo die Messias sal kom omdat dit die poort was waardeur Jesus op die donkie gekom het. Hy is toegebou deur Suleiman the Magnificent, van die Moslems wat  daardie tyd Jerusalem verower het om te verhoed dat die Messias terugkom. Min wetende dat die Messias klaar gekom het.

‘n Pragtige vrou saam met ons op toer.  Die Jode en Arabiere wou haar net koop.  Ons het dadelik gekliek en het heerlik gekuier.  Haar man het vir ek en Hettie baie gehelp met ons bagasie.

Ons het die Church of all Nations besoek wat so genoem word omdat hy gebou is deur donasies van 16 nasies.

Church off all nations

 Die klip waarop Jesus bloed gesweet het van angs terwyl Hy bid voor hy in hegtenis geneem is. Dit is binne in die kerk.

 

Daarna is ons na die tuin van Getsemane (Olyfpers) waar ons ‘n diens gehad het en alleentyd gehad om met die Here te praat.  Daar is massiewe olyfbome wat party mense glo uit Jesus se tyd is.  Maar die gids sê dit is net baie oud.

Die Tuin van Getsemanè waar Jesus gebid het voor HY in hegtenis geneem is. Dit was ‘n baie emosionele besoek.

 

Pragtige geboue in Jerusalem. Daar is ‘n wet in Israel dat alle geboue met die ligte ‘Jerusalem-steen’ gebou word wat bestaan uit sand of kalksteen.

 

Jerusalem o Jerusalem stad van my hart

Ek verjaar nog steeds: 29 September

Ek kon nie wag om in Jerusalem te kom nie en soos Psalm 122:2 sê:  “Ons voete staan in jou poorte, o Jerusalem.”.   Terwyl ons die buitewyke binnery het “Jerusalem” op die CD speler kliphard gespeel en dit was ‘n hoendervleis oomblik.  Die werklikheid van Israel het my daar werklik getref, wat ‘n verjaardag!  Jerusalem het ‘n baie lang en interessante geskiedenis.

My eerste glimps van Jerusalem – hoendervleis

Langs die pad staan yster doppe wat gemaak is vir die motors om hulle te beskerm teen handgranate wat op hulle gegooi is ‘n paar jaar gelede.  Jy sit die dop aan, ry tot in Jerusalem en haal dit af, wanneer jy teruggaan sit jy dit weer aan.

Aangesien hierdie ‘n propvol dag was en ons nog die aand uitgegaan het, is ons reguit hotel toe om te bad en te eet.  ‘n Pragtige hotel met weereens die heerlikste kos.  Ek het geskater van die lag oor Hettie en die hotelpersoneel se kommunikasie om vir ons ‘n badprop in die hande te kry.  Dit was handgebare en woorde en al wat hulle bly vra vir haar is: “doesh doesh?” wat ek dink ‘was’ beteken.  Later sou ons uitvind die hotelle verkies mens moet stort omdat water skaars is.

 

Die aand het oor die 400 Christene uit Suid Afrika bymekaar gekom vir ‘n Gospel Fees.  Angus Buchan was vir ‘n rukkie daar voor hy sy vlug terug Suid Afrika toe moes haal.  Izak Burger het die Boodskap gebring en Jan de Wet, Willie & Natasha Joubert, Stass en Wian Vos het gesing.  Wat ‘n ongelooflike vertoning.  Ek het voorwaar die wonderlikste en besigste verjaardag ooit gehad.  Ons het omtrent na ‘n bad ‘uitgepass’ in die bed. Doodmoeg!!!!

Ons was die volgende oggend vroeg op soos gewoonlik.  Wanneer ek en Hettie 6uur in die oggende ons “wake up calls” van onvangs kry was ons gewoonlik al gebad en besig met aanttrek en hare.  Ontbyt was gewoonlik 7uur en 8uur ry die bus. Ek het baie uitgesien na die dae in Jerusalem.

Caesaria – pragtige kusdorp

Ek verjaar nog steeds: 29 September

Nou was ons oppad na Caesaria op die kus, ‘n kunsmatige hawe en koningstad op sand gebou deur Herodus die Grote 13vC.  Pontius Pilatus het ook later daar gewoon en Paulus was daar in die tronk. Baie Jode en Christene is hier gemartel en doodgemaak deur die Romeine.  Filippus en Paulus het die Evangelie hier verkondig en word Cornelius waarskynlik die eerste bekeerde nie-Jood.  Dit is ook waar Herodus Agrippa op ‘n groot byeenkoms hom verhef bo God en word deur wurms verteer en sterf op die trappe. Hand 12:23.  Daar is ‘n massiewe amfiteater wat steeds gebruik word vir konserte.

Die ou stad Caesarea het ‘n standvastige watertoevoer nodig gehad.  Oorspronklik het hulle water gekry vanaf fonteine maar dit was gou te min soos die mense meer geword het. In  37vC tot 4vC het koning Herodus toe ‘n akwaduk (waterleiding) gebou wat later groter gemaak is deur die daaropvolgende heersers.  Die water het gekom van Shummi op die suide van berg Karmel, 10km vanaf Caesarea.  Die water het gevloei bo-op die waterleiding en is op een plek deur ‘n rots gekap. Later moes nog een langs die oorspronklike een gebou word.  Hierdie waterleiding was in werking vir 1200 jaar en is gereeld reggemaak en in stand gehou.  Toe die eerste 2 te veel skade het is daar weer een gebou en daarna die laaste en vierde een.

Elia op berg Karmel (Wingerd van God)

Ek verjaar nog steeds: 29 September

Die volgende stopplek op ons roete na Jerusalem was die berg Karmel (Wingerd van God) waar Elia die 450 Baäl priesters en Isèbel se 400 profete van Asjera uitgedaag het om tot hulle god te bid vir reën en hy sal tot God bid. 1Kon 18:22-46.  Dit was na 3 jaar van droogte.  Die hele volk Israel was ook daar. Die priesters het tot laatmiddag die afgod aangeroep maar niks het gebeur.  Elia het die altaar van die Here wat afgebreek was herstel met 12 klippe, ‘n sloot gegrawe en baie water op die altaar en bul gegooi.  Daarna het hy gebid en die Here het alles, met water en al, deur vuur verteer. Daarna het hulle al die vals profete doodgemaak.  Daarna het ‘n wolkie so groot soos ‘n mens se hand verskyn (1 Kon 18:44) en toe het dit baie gereën.  Na hom was Elisa priester en bo-op die berg bid  hy vir die Sunamietiese vrou se kind waarna hy lewend word, 2 Kon 4:25.  Daar is ‘n asemrowende uitsig bo-op die berg en ons het daar ‘n diens gehou.

Megiddo

Daarna is ons na Megiddo waar die slag van Armaggedon gaan plaasvind.

Oppad na Megiddo het ons net verby Berg Tabor (the high mountain apart) gery. Dit is die hoogste berg in die omgewing met ‘n kerk bo-op die berg; Basilica of Transfiguration.  Dit is waar Jesus vir Petrus, Jakobus en Johannes geneem het en voor hulle oë verheerlik is en hulle vir Moses en Elia ook gesien het, Matt 17:2. Dit is ook waar Gideon en sy 300 manne die Midianiete verslaan het, 1 Sam 28:7, en Saul en sy seuns gesterf het.

Slag van Armageddon is (soos deur iemand anders verduidelik is):

Twee Groot Oorloë in Israel 

Die Bybel profeteer twee groot oorloë wat in die eindtyd in Israel gevoer sal word. Die eerste is die Russies-Arabiese inval in Israel (Eseg. 38 en 39), en die tweede die slag van Armageddon (Sag. 14; Op. 19). Die eerste een sal ‘n groot streeksoorlog en die tweede een ‘n wêreldoorlog wees waardeur alle mense op aarde geraak sal word. Beide hierdie oorloë sal deur die koninkryk van die duisternis aangeblaas word in ‘n poging om die openbaring van God se koninkryk op aarde te voorkom.   http://www.bibleguidance.co.za/Afrartikels/TweeOorloe.htm

Megiddo word reeds 1500vC in Egiptiese geskrifte genoem en is deur Joshua verower; Jos 12:2.  Van die hewigste gevegte in die Bybel is hier geveg.  Napoleon het ook later hier geveg.

Daar is baie uitgrawings gedoen en daar het ons ook ‘n krip uit Jesus se tyd gesien.

Daar is stalle, paleise en skure.  Deur die tye is 20 stede verwoes en oor die vorige een gebou.  Die stad se watersisteem was indrukwekkend en dateer 2800 jaar terug.

Onder deur die stad loop ‘n tonnel wat ‘n fontein verbind met die stad.  Ons het deur die tonnel geloop, gelukkig is daar intussen nou trappe ingesit en gaan dit beter.  Die eerste deel het 190 trappe en skoonsuster Hettie was seker iemand het verkeerd getel en dat daar baie meer is. Ons het lekker vir haar aanmerkings gelag.

Hier is ons darem al oppad uit.

Ek verjaar in Jerusalem – wat ‘n voorreg!

Ek verjaar: 29 September 2013

My verjaardag begin met ‘n besoek aan die Berg van Saligsprekinge waarop ‘n baie groot en mooi kerk gebou is met die wonderlikste uitsig oor die See van Galilea.  Na ‘n diens deur Liesel ons toerleier, het ons deur die kerk geloop.  Soos baie van die Katolieke Kerke in Israel  is die kerk baie versier maar baie mooier as van die ander kerke.  Elke Saligspreking is in ‘n loodglas venster uitgebeeld, Matt 5:1-12.

Die tuin is ‘n lushof en daar is so baie hoeke waarvan mens fotos wil neem, veral die seeuitsig wat vir my een van die mooistes was wat ek in Israel gesien het.  Daar het die 80 jarige tannie Bets vir my ‘n bossie blomme gepluk vir my verjaardag.

Skoonsus en ek geniet ons gate uit!